काठमाडौं । नेपाली महिला क्रिकेट टिमले खेलेको पहिलो अन्तर्राष्ट्रिय सिरिजको पहिलो खेलमा सुखद् शुरुआत गरेको छ। आज भएको खेलमा नेपालले कतारमाथि १ सय १९ रनको भारी अन्तरले जित निकालेको हो।
खेलमा टस हारेर पहिला ब्याटिङ गरेको नेपालले २० ओभरमा चार विकेट गुमाउँदै १ सय ४६ रनको योगफल तयार पारेको थियो। नेपालका लागि इन्दु बर्माले अर्धशतक प्रहार गरिन्। उनले ४७ बलमा ५५ रनको योगफल बनाइन्। त्यसैगरी सीता रानामगरले ३३ र सरीता मगरले २१ रन बनाए।
जवाफमा नेपालको धारिलो बलिङसामु कतार १२ औं ओभरमा २७ रनमै अलआउट भयो। नेपालका लागि रुबिना चौधरीले तीन तथा कविता कुँवर र सीता रानामगरले दुई/दुई विकेट लिए।
खातै २ विकेट गुमाएको कतारका कुनै पनि ब्याटरले दोहोर अंकमा रन बनाउन सकेनन्। नेपालकी इन्दु बर्मा प्लेयर अफ दी म्याच घोषित भइन्।
यो जितसँगै नेपालले तीन म्याचको सिरिजमा १-० को अग्रता कायम गरेको छ। नेपालले भोलि फेरि दोस्रो म्याच खेल्नेछ। यसै साता यूएईमा हुने टी ट्वान्टी विश्वकपको एशियाली छनोटको तयारीका लागि यो सिरिज खेलेको हो।
