वीरगञ्ज, २७ कार्तिक । नेपाल भ्यालुयर्स एसोसियसन वीरगञ्ज च्याप्टरले मूल्यांकन सम्बन्धी सम्पूर्ण कार्य पूर्ण रुपले बन्द गरेको छ ।
एसोसियसनका वीरगञ्ज च्याप्टर सदस्य ईन्जिनियर राजेश चौरसियाले कुमारी बैंकबाट प्राप्त कागजातको आधारमा मूल्यांकन गरी मालपोत कार्यालयबाट समेत दृष्टिबन्धक तथा जग्गा रोक्का जस्ता कार्य सम्पन्न भएर पनि प्रवाहित ऋण चुक्ता भइसकेको अवस्थामा अनुसन्धानको नाममा एसोसियसनका सदस्यलाई हिरासतमा लिएको भन्दै एसोसियसनले सम्पूर्ण कार्य बन्द गरेको हो ।
बैंकले उपलब्ध गराएको कागजात शुद्धताको परीक्षण गर्ने काम मूल्यांकनकर्ताको जिम्मेवारीभित्र नपर्ने हुँदा अनुसन्धानकै लागि हिरासतमा लिनु ज्यादतीपुर्ण व्यवहार भएको एसोसियसनका अध्यक्ष ईन्जिनियर मुन्ना कुमार सर्राफद्वारा हस्ताक्षरित प्रेस विज्ञप्तीमा उल्लेख गरिएको छ । साथै नेपाल भ्यालुयर्स एसोसियसनको केन्द्रिय समितिले घोषणा गरेको आन्दोलन तथा विरोधका कार्यक्रममा ऐक्यतबद्धता जनाउँदै कामकाज बन्द गरिएको पनि अध्यक्ष सर्राफले भने ।
