राहुल र शाहरुख
मुम्बई(आजतक)– बलिउड अभिनेता शाहरुख खान र उनकी पत्नी गौरी खानको छोरा आर्यन खान लागुऔषध मामलामा बलिउडमा निकै छाए । यद्यपि उनले अक्टोबर ३० मा अदालतबाट जमानत पाइसकेका छन् । तर पनि शाहरुख र गौरी छोराका लागि उत्तिकै चिन्तित छन् । उनीहरु आर्यनको मानसिक स्वास्थ्यमा ध्यान दिइरहेका छन् ।
यहीबीचमा काँग्रेस नेता राहुल गान्धीले गत महिना अक्टोबर १४ मा शाहरुख र गौरीलाई एक पत्र लेखेको खुलेको छ । उनले पत्रमा आर्यनको लागुऔषध मामलामा नाम आएपछि आफू चिन्तित भएको उल्लेख गरेका थिए ।
पत्रमा राहुलले शाहरुख र गौरीले भोगेको पीडालाई आफूले महशुस गर्ने उल्लेख गरेका थिए । उनले कसैको पनि सन्तान यस किसिमको पीडालाई स्वीकार्न नसक्ने जनाएका थिए । राहुलले आफूले शाहरुखलाई आम मानिसका लागि राम्रो काम गरेको देखेको लेखेका थिए । पत्रमा शाहरुखका लागि फ्यानले गरेको प्रार्थना र शाहरुखको सकारात्मक कामले आर्यन छिट्टै रिहा हुनेमा आफू आशावादी रहेको जनाएका थिए ।
मुम्बईबाट गोवातर्फ जान लागेको क्रुजमा भएको ड्रग्स पार्टीमा आर्यनसहित ८ जना पक्राउ परेपछि उनी २८ दिनसम्म मुम्बईस्थित आर्थर रोड जेलमा थिए । उनलाई अदालतले जमानतमा रिहा गरे पनि उनले कैयौं शर्त पालना गर्नुपर्नेछ । जसअनुसार प्रत्येक शुक्रबार एनसीबीको भवनमा बिहान ११ बजेदेखि दिउँसो दुई बजेसम्म आर्यन बस्नुपर्नेछ । उनले अन्य आरोपीसँग सम्पर्क गर्न पाउनेछैनन् ।
