वीरगञ्ज, १७ कार्तिक ।
वीरगञ्जको एक सरकारी विद्यालयका प्रधानाध्यापकको अजिव चर्तिकला उजागर भएको छ ।
उनी हुन् बिनोद मेहता, जो वीरगञ्ज महानगरपालिका वडा नम्बर १४ पिप्रास्थित श्री नृसिंह माद्यामिक विद्यालयमा प्रधानाध्यापकको रुपमा कार्यरत छन् ।
मेहताले कार्तिक महिना नसकिँदै मंसिर महिनाको हाँजीरी बनाएको प्रमाण फेला परेको छ । प्राप्त हाँजीरीअनुसार मेहता कार्तिक महिनामा ४ गते मात्रै विद्यालयमा उपस्थित छन् । तर यो समाचार लेखेको दिन बुधवार कार्तिक १७ गते भएपनि उनले मंसिर महिनाको १० गतेसम्म हाँजीरी लगाएको हाँजीरी रजिस्टरमा स्पष्ट देखिन्छ । उनले आफ्नो मंसिर महिनाको पहिला नै हाँजीरी लगाउने काम मात्रै गरेका छैनन । मेहताले विद्यालय व्यवस्थापन समितिको निर्णय बिना नै मनोमानी ढंगले २२ जनालाई निजी स्रोतबाट तलब दिने गरी शिक्षकमा जागिर समेत दिएका छन् ।
शिक्षण कम राजनीति बढी गर्ने प्रधानाध्यापकको रुपमा पनि मेहता परिचित छन् । आर्थीक चलखेल गरेरै उनीहरुलाई शिक्षकमा नियुक्ती गरेको उनकै विद्यालय व्यवस्थापन समितिका अध्यक्ष रामबाबु कुर्मीले आरोप लगाएका छन् ।
यसअघि माइस्थान विद्यापिठ माविमा हुँदा समेत सरुवा नगर्न भन्दै विद्यार्थीहरुलाइ उक्साएर आन्दोलन गर्न सडकमै उतारेको कर्तुतले पटक पटक विवादमा मुछिदै आएका छन् ।
तर यता प्रधानाध्यापक मेहताले कार्तिक महिनामा गर्नुपर्ने हाँजीरी दृष्टि भ्रमका कारण मंसिरमा गरेको प्रतिक्रिया दिए । आफुले झुक्किएर मंसिरमा हाँजिरी गरेको मेहताको स्पष्टोक्ति छ ।
