भदौ, १४ वीरगंज । बाराको प्रसौनी गाउँपालिकामा लाखौं रुपैयाँ अनियमितता भएको पाईएको छ । प्रसौनी गाउँपलिकामा आर्थिक वर्ष २०७९/८० मा तालिम लगायतको सचेतना कार्यक्रममा ४० लाख बढि रुपैयाँ खर्चेर लाखौं रुपैयाँ अनियमितता गरेको पाईएको छ ।
भ्रष्टाचार गर्न सूक्ष्म अनुभव बटुलेका प्रसौनी गाउँपालिकाका लेखा प्रमुख प्रेमबाबु प्रसादले प्रमुख प्रशासकीय अधिकृत, योजना प्रमुख लगायतको मिलेमतो ब्युनिसियन तालिम, सिलाई कटाई, शैक्षिक अध्ययन तालिम लगायतको कार्यक्रममा ४० लाख १९ हजार ९४७ं रुपैयाँ खर्च देखाई अनियमितता गरेको स्थानीयको आरोप छ । जुन विद्यमान ऐन कानुन पालना नगरि हचुवाको तालमा गरेको कार्यक्रमले समेत पुष्टि गरेको देखिन्छ ।
कमिसनको सेटिङ्गमा लागत अनुमान बिनै ऐन विपरित सोझै खरिद
सार्वजनिक खरिद नियमावलीको नियम ५(१) मा सार्वजनिक निकायले निर्माण कार्यको हकमा बाहेक १ लाख रुपैयाँ भन्दा बढिको जुन सुकै खरिदको लागत अनुमान तयार गर्नुपर्ने तथा सोही नियमावलीको नियम ५(क) मा लागत अनुमान स्वीकृत गर्नु पर्ने व्यवस्था उल्लेख छ । तर पालिकाले उपरोक्त अनुुसारको १ लाख भन्दा बढिको खरिद कार्य गर्नुपूर्व लागत अनुमान तयार तथा स्वीकृत नगरि विभिन्न फर्म तथा संस्थाहरुबाट ऐन विपरित पटक पटक गरि ४० लाख भन्दा बढि रकम सोझै खरिद गरेको महालेखा परिक्षक कार्यालयको प्रतिवेदनबाट खुलेको छ ।
सार्वजनिक खरिद नियमावली २०६४ को नियम ८५ (१ख) मा एक आर्थिक वर्षमा एक पटक वा पटक पटक गरि ५ लाख भन्दा बढि रकमको वा एउटै व्यक्ति फर्म,कम्पनी वा संस्थाबाट एक पटक भन्दा बढि सोझै खरिद गर्न नसकिने व्यवस्था छ ।
तर प्रसौनी गाउँपालिकाका तत्कालिन प्रमुख प्रशासकीय अधिकृत, योजना प्रमुख, लेखा प्रमुख प्रेमबाबु प्रसाद लगातयले आर्थिक वर्ष २०७९÷८० मा व्युटिसियन तालिम, सिलाई कटाईको लागि समृद्ध मेधश परामर्श तथा तालिम केन्द्र प्रा.लि.लाई ४ लाख, ४ लाख ८५ हजार २ लाख ९० हजार गरि झण्डै पौने १२ लाख रुपैयाँ भुक्तानी गरेका छन् । यसले समेत मिलेमतोमा खरिद ऐन विपरित मिलेमतोमा अनियमितता भएको पुष्टि हुन्छ ।
लेखा प्रमुख सहितको मिलेमतोमा सिलाई कटाई तालिमकै लागि शिक्षित प्रदेश परामर्श तथा तालिम केन्द्र प्रा.लि.लाई २ लाख ९० हजार भुक्तानी गरिएको छ भने शैक्षिक अध्ययनको लागि ग्रामिण विकास अभियान केन्द्र बारालाई १ लाख ९० हजार भुक्तानी गरिएको छ । लोकसेवा कक्षा संचालनको लागि राष्ट्रिय जनचेतना विकास केन्द्र ५ लाख ९१ हजार भुक्तानी गरिएको छ भने लोकसेवाकै कक्षा संचालनको लागि सक्सेस स्किल डेभलप्मेन्ट फर्मलाई ४ लाख ८५ हजार भुक्तानी गरिएको छ ।
कृषि विषादी सहितका तालिमको लागि तराई डेभलप्मेन्ट फाउन्डेशनको नाममा ४ लाख खर्च देखाईएको छ भने सिलाई कटाई तालिममा मानव तथा वातावरण विकास नेपाललाई ४ लाख ९५ हजार खर्च देखाईएको छ । यसरी तालिम लगायतका सचेतना मूलक कार्यक्रममा ४० लाख १९ हजार रुपैयाँ सकाएको छ । जुन खर्च नियमसंग नभएको उल्लेख गर्दै महालेखाले बेरुजू कायम गरेको छ । यसले समेत कमिसनको लोभमा अवैध सम्पती जोड्ने नियतले विद्यमान कानून विपरित तालिम कार्यक्रम गरी भ्रष्टाचार गरिएको स्थानीयको अरोप पुष्टि हुन्छ ।
कार्यक्षेत्रगत शर्त पुुरा नगरि आवश्यकता बिनै उपलब्धी बिहिन कार्यक्रम
सार्वजनिक खरिदको नियमावली अनुसार गैर सरकारी संस्थाहरुबाट काम गराउँदा त्यस्तो कामको आवश्यकता, किसिम,समयाअवधी,कामको गुणस्तर,जनशक्ति,कार्य संचालन कार्यविधि सहित कार्य क्षेत्रगत शर्त प्रकृया पुरा गर्नुपर्ने हुन्छ ।
तर प्रसौनी गाउँपालिकामा लामो समयदेखी कार्यरत लेखा प्रम्ख प्रेमबाबु प्रसादले आफ्नै आसेपासेको संस्थासंग श्रम बजारको सर्वेक्षण नगरि उपरोक्त सबै प्रकारका तालिमका लागि तालिम प्रदायक संस्थाले रोजेको स्थानमा चाहेको तालिम दिन सक्ने गरि संस्था छनौट गरि तालिम संचालन गरि लाखौं रुपैयाँ घोटाला गरेको स्थानीयको आरोप छ ।
विद्यमान ऐन कानुनको त्यस्तो कुनै प्रकृया पुरा नगरेबाट आवश्यकता बिनै गैर सरकारी संस्थाको सेटिङ्गमा हचुवाको भरमा बजेट राखि विकासे बजेटको ४० लाख रुपैयाँ खर्च देखाई अनियमितता गरिएको स्थानीयको आरोप नर्कान सकिदैन् । अर्काे भने खर्च देखाइएको जतिको उपलब्धी समेत भएको देखिदैन् । जुन गाउँपालिका तथा मलेपको तथ्यले समेत पुष्टि गरेको छ ।
