नेपाल बहु-सांस्कृतिक, बहु-धार्मिक र बहु-जातीय समाज हो, जहाँ हिन्दु, मुस्लिम, बौद्ध, क्रिश्चियन लगायत विभिन्न समुदायहरू मिलेर बसेका छन्। संविधानले सबै धर्म, भाषा र संस्कृतिको सम्मान गर्ने नीति अपनाएको छ, जसअनुसार प्रत्येक नागरिकलाई आफ्नो धार्मिक आस्थाअनुसार चाडपर्व मनाउने अधिकार प्राप्त छ।
तर मुस्लिम समुदायका लागि महत्वपूर्ण पर्व इद आउँदा कतिपय विद्यालय तथा कलेजहरूले परीक्षा तोकिदिँदा मुस्लिम विद्यार्थीहरू ठूलो तनावमा पर्छन्। हिन्दु समुदायका लागि दसैँ विशेष भएजस्तै, मुस्लिम समुदायका लागि इद समान रूपमा महत्वपूर्ण छ।
इदको दिन परीक्षा, विद्यार्थीहरू असमञ्जसमा
इद मुस्लिम समुदायका लागि मात्र चाड होइन, यो धार्मिक आस्था, परिवारसँग पुनर्मिलन र आध्यात्मिक महत्वको प्रतीक पनि हो। तर जब इदकै दिन परीक्षा परिहाल्छ, मुस्लिम विद्यार्थीहरूले न त आफ्नो पर्व मनाउन सक्छन्, न त परीक्षा नै छाड्न सक्छन्। यसले उनीहरूलाई ठूलो मानसिक तनाव सिर्जना गर्छ।
धर्मनिरपेक्ष राष्ट्रको रूपमा नेपालले सबै समुदायका चाडपर्वलाई सम्मान गर्नुपर्छ। विद्यालय तथा कलेजहरूले सबै धर्मका महत्वपूर्ण चाडहरूमा विदा दिनुपर्छ वा कम्तीमा ती दिन परीक्षा नतोकी विद्यार्थीहरूको धार्मिक स्वतन्त्रतालाई सुनिश्चित गर्नुपर्छ।
समाधानको आवश्यकताः समान अवसर र धार्मिक सम्मान
शिक्षा क्षेत्रले यस विषयमा गम्भीरतापूर्वक सोच्नुपर्ने देखिन्छ ताकि कुनै पनि समुदायका विद्यार्थीहरू आफ्ना चाडपर्व मनाउने अवसरबाट वञ्चित नहुन। यसले संविधानको धार्मिक स्वतन्त्रताको भावनालाई बल पुर्याउनेछ र सबै नागरिकलाई समान अवसर प्रदान गर्ने सुनिश्चितता मिल्नेछ।
