वीरगञ्ज, २ माघ । इलाका प्रहरी कार्यालय बरहथवाले हत्यामा संलग्न ३ जनालाई पक्राउ गरेको छ । एक हप्ता पहिला सर्लाहीको बरहथवा नगरपालिका वडा नम्बर १० निवासी राम छविला साहको उखू खेतभित्र हत्या गरि फालेको अवस्थामा महिलाको शब फेला परेको थियो ।
बरहथवा नगरपालिका – १०, कटानीकी ३२ वर्षीय महिला सावित्री कुमारी महरा चमारको हत्यामा संलग्न तीन जनालाई शनिबार इलाका प्रहरी कार्यालय बरहथवाले पत्रकार सम्मेलन गरी शनिवार सार्वजनिक गरेको छ ।
क्राउ पर्नेमा हरिवन नगरपालिका –१०, ताईवान टोल घर भएका २७ वर्षीय सन्तोष साह, २७ वर्षीय मुकेश ब्लोन र २२ वर्षीय रोहित हजरा रहेको इलाका प्रहरी कार्यालय बरहथवाका प्रहरी नायब उपरीक्षक उमाशंकर यादवले जानकारी दिए ।
उनीहरू तीनै जना एउटै गाउँका हुन् । महिलाको हत्या भएको एक साताभित्र तीनै जनालाई प्रहरीले फरक फरक मितिमा पक्राउ गरी अनुसन्धान गर्दा महिलाको हत्या उनीहरुले सामूहिक रुपमा गरेको प्रहरीमा बयान दिएका छन् ।
महिलालाई राति घरबाट बोलाएर मुख बन्द गरेर घाँटी थिचेर हत्या गरेको र मृतक महिलाको शव उखुबारीमा लगेर आगो लगाइ भागेको बयान उनीहरुले प्रहरीलाई दिएका छन् । पुस १७ गतेदेखि घरबाटै हराएकी महिला घर नफर्केपछि स्थानीयले पुस २३ गते बिहान उखु बारीमा जलेको अवस्थामा शव फेला परेका थिए ।
हत्यामा संलग्न सन्तोष साहसँग मृतक महिलाको एक वर्ष देखि चिनजान भएको र मृतक महिलाले केही पैसा जग्गा खरिद गर्न साहलाई दिएको अनुसन्धानबाट खुलेको प्रहरीले जनाएको छ । मृतक महिला र साहबीच प्रेम सम्बन्ध समेत रहेको र मृतक महिलाले साहलाई विवाह गरेर सँगै लैजान भनेपछि आफूले हत्या गरिएको साहले प्रहरीसँगको बयानमा स्वीकार गरेका छन् ।
प्रहरीले हत्यामा प्रयोग गरिएको पल्सर २२० सीसीको मोटरसाइकल समेत बरामद गरेको छ । मृतक महिलाको श्रीमान दुई वर्ष देखि वैदेशिक रोजगारीको सिलसिला कतारमा छन् ।
