काठमाडौं : सरकारले आजबाट कोभिड-१९ विरुद्ध बुस्टर डोज खोप दिने भएको छ। पुस २८ गते बसेको मन्त्रिस्तरीय बैठकबाट उक्त निर्णय भएको उल्लेख गर्दै स्वास्थ्यमन्त्रालयले ७ वटै प्रदेश स्वास्थ्य निर्देशनालयलाई बुस्टर मात्रको खोप दिन परिपत्र गरेको छ।
परिवार कल्याण महाशाखाका जनस्वास्थ्य अधिकृत अन्जु बस्नेतले जारी गरेको परिपत्रमा प्रदेश स्वास्थ्य आपूर्ति व्यवस्थापन केन्द्र र ७७ वटै स्वास्थ्य कार्यलयलाई बोधार्थ गर्दै बुस्टर मात्राको खोप लगाउन निर्देशन दिएको छ। माघ २ गते आजदेखि अग्रपंक्तिमा खटिने व्यक्ति र माघको १४ गतेदेखि ६० वर्षमाथि र खोपको पूर्ण मात्रा लगाएको ६ महिना पूरा भएका व्यक्तिलाई बुस्टर मात्राको खोप दिइने स्वास्थ्य मन्त्रालयले जानकारी दिएको छ। बुस्टर मात्रामा कोभिडसिल्ड लगाएकालाई कोभिसिल्ड नै, भेरोसेल लगाएकालाई भेरोसेल खोप नै दिइने मन्त्रालयले जनाएको छ।
