बुटवल : नेकपा एमाले रुपन्देहीको अध्यक्षमा तेजेन्द्र केसी निर्वाचित भएका छन्। उम्मेदवारी दिएका पुरुषोत्तमा घिमिरेले उम्मेदवारी फिर्ता लिएपछि नवौं जिल्ला अधिवेशनबाट केसी सर्वसम्मत रुपमा अध्यक्ष बनेका हुन्।
वि.सं २०४१ सालमा रुपन्देहीको पर्रोहा माविमा तत्कालीन अनेरास्ववियु पाचौंबाट विद्यार्थी संगठनमा आवद्ध भएका केसीले २०४६ सालको जनआन्दोलनमा तत्कालीन पश्चिम दक्षिण कमिटी (फर्साटिकर–मुर्गीया–सालझण्डी) को नेतृत्व गरेका थिए। २०५३ सालमा बुटवल बहुमुखी क्याम्पसको स्ववियु सभापतिमा निर्वाचित भएका थिए। एमाले रुपन्देहीमा ६ कार्यकाल विभिन्न जिम्मेवारीमा रहेर काम गरीसकेका केसी पछिल्लो समय जिल्ला सह-संयोजक थिए।
त्यस्तै, उपाध्यक्षमा जागेश्वरदेवी चौधरी निर्वाचित भएकी छन्। उनी रुपन्देहीको तिलोत्तमा नगरपालिकाको उपप्रमुख समेत हुन्। त्यस्तैगरी सविचमा यज्ञ गैरे चयन भएका छन्। सचिवमा उम्मेदवारी दिएका खेमप्रसाद लुइटेलले उम्मेदवारी फिर्ता लिएपछि गैरे सर्वसम्मत बनेका हुन्।
उपसचिवद्वयमा चित्रबहादुर कार्की र हितराज पन्थी चयन भएका छन्। कार्की रुपन्देहीको सैनामैना नगरपालिकाका प्रमुख समेत हुन्। रूपन्देही एमालेका उपाध्यक्ष विष्णु पौडेल, सचिव छविलाल विश्वकर्मा र अर्का नेता घनश्याम भुसालको गृहजिल्ला हो।
अधिवेशनबाट रूपन्देहीमा १५१ सदस्यीय जिल्ला कमिटी बनेको छ।