पोप फ्रान्सिसले सन्तानहरू भन्दा घरपालुवा जनावर रोज्ने व्यक्तिहरूले स्वार्थी व्यवहार देखाइरहेको बताएका छन्। भ्याटिकन सिटीको रोममा ‘अभिभावकत्व’ बारेमा छलफलका क्रममा उनले यस्तो बताएका हुन्।
‘आज.. हामीले स्वार्थको रुप देखिरहेका छौं,’उपस्थित व्यक्तिहरुलाई सम्बोधन गर्दै उनले भने, ‘अहिले केही मानिसहरु बच्चा चाहँदैनन्। कहिलेकाहीँ उनीहरुसँग एउटा बच्चा हुन्छ। त्यती हो। तर तिनीहरुसँग कुकर र बिरालो हुन्छन्, जसले बच्चाहरुको ठाउँ लिएको छ। यसले मानिसहरुलाई हसाएको छ। तर यो वास्तविकता हो।’
‘यो अभ्यासले पितृत्व र मातृत्वलाई अस्वीकार र कमजोर बनाएको छ। यसले मानवता हराउँछ’उनले भने।
उनले जैविक कारणले सन्तान जन्माउन नसक्नेहरुले ‘एडप्सन’ बारे सोच्नुपर्ने बताएका छन्। पोपले मानिसहरुलाई अभिभावकत्व लिनबाट नडरानउन समेत आग्रह गरेका छन्।
मानिसहरुले सन्तानको सट्टा घरपालुवा जनावरलाई प्राथमिकता दिने गरेको बारे उनले पहिलोपटक बोलेका होइनन्। सन् २०१४ मा पनि उनले सन्तानको सट्टा घरपालुवा जनावरलाई महत्व दिनु ‘सांस्कृतिक पतनको अर्को घटना’ भएको बताएका थिए। उनले आमाबुवा र बच्चा बिचहुने ‘जटिल’ सम्बन्धभन्दा जनावरसँग ‘सजिलो’ सम्बन्ध भावनात्मक हुँदै गएको समेत बताएका थिए।
