काठमाडौं: नुवाकोटको बेलकोटगढी नगरपालिकामा ५ मा माघ ८ गते झिल्टुङ क्रस कन्ट्री दौड हुनेभएको छ। विभिन्न १० विधामा आयोजना हुने यो प्रतियोगिताको छैठौं संस्करण हो।
दौड कोल्पुटारबाट सुरु भएर बेलिनी, छापा, राजओडार, खड्गाछाप, सालचौर हुँदै कोल्पुटारमा आएर टुंगिनेछ। यो दौडको दुरी १३.४ किलोमिटर छ जसमा ४.५ किलोमिटर उकालो, २ किलोमिटर समथर र बाकीँ ओरालो रहेको छ।
झिल्टुङ दौडको खुलातर्फ पहिलो संस्करणमा पुरुषतर्फ होमलाल श्रेष्ठ र महिलातर्फ सन्तोषी श्रेष्ठ प्रथम भएका थिए। त्यस्तो दोस्रो संस्करणमा भूमिराज राई र कान्छीमाया कोजु, तेस्रो संस्करणमा किरण बोगटी र पुष्पा भण्डारी, चौथो संस्करणमा काश राई र प्रिया राई तथा पाँचौं संस्करणमा सुमन कुलुङ र हुमी बुढामगर विजयी भएका थिए।
१० वटा विधामा १३.५ किमी खुला, १३.५ किमी खुला स्थानीय, ४.५ किमी खुला जुनियर १६ वर्ष मुनी, ४.५ किमी स्थानीय १६ वर्षमुनी, ४.५ किमी स्थानीय ४५ वर्ष माथि, भेट्रान खुला १३.५ किमी गरी ६ वटा विधा पुरुषतर्फका लागि रहेको छ। महिलातर्फ १३.५ किमी खुला, ४.५ खुला जुनियर १६ वर्षमुनी, ४.५ किमी स्थानीय १६ वर्ष मुनी र स्थानीय आमाको १.५ किमी रिले दौड गरी ४ वटा विधा रहेका छन्।
