खार्तुम : सुडानका प्रधानमन्त्री अब्दुल्लाह हामदोकले राजीनामा दिएका छन्। हामदोकले आइतबार आफ्नो पदबाट राजीनामा दिएका हुन्। सुडानमा पछिल्लो समय राजनीतिक संकट गहिरिँदै गएको छ। यहाँ प्रजातान्त्रिक प्रक्रियाबाट निर्वाचनको प्रयास भने जारी छ। राजनीतिक संकट थप बढ्दै गएका बेला हामदोकले आफ्नो पदबाट राजीनामा दिएको बताइएको छ।
नागरिक शासन बहाल गर्न माग गर्दै प्रदर्शन चर्किएपछि अब्दुल्लाह हामदोकले प्रधानमन्त्रीबाट राजीनामा दिएको बताइएको छ। टेलिभिजनमार्फत् देशवासीलाई सम्बोधन गर्दै प्रधानमन्त्री हामदोकले राजीनामा घोषणा गरेका हन्।
देशलाई अप्ठ्यारो अवस्थामा फस्नबाट जोगाउन आफूले सक्दो प्रयास गरेको तर सहमतिमा पुग्न नसकेको उल्लेख गर्दै उनले भने, ‘मैले जिम्मेवारी फिर्ता गर्ने निर्णय गरेको छु र प्रधानमन्त्रीको रुपमा मेरो राजीनामा घोषणा गरेको छु।’
गत अक्टोबर महिनामा सेनाले कू गर्दै सत्ता कब्जा गरेपछि हामदोकलाई नजरबन्दमा राखेको थियो। त्यसपछि केही हप्ता अगाडि मात्रै उनलाई सेनाले प्रधानमन्त्रीमा पुनःबहाली गरेको थियो। पछि सेनासँग सम्झौता गरी प्रधानमन्त्री बनेको भन्दै उनको विरोध हुँदै आएको थियो।
सुडानका नागरिकहरुले सेनासँगको सम्झौता नमान्ने र पूर्ण नागरिक शासन बहाल हुनुपर्ने माग गर्दै आएका थिए। उक्त प्रदर्शनको क्रममा दुई जनाको मृत्यु भएको थियो। प्रदर्शन रोक्ने उद्देश्यले सरकारले हालै राजधानी खार्तुममा इन्टरनेट सेवामा रोक समेत लगाएको थियो। रासस/सिन्ह्वा
