वीरगञ्ज, ५ मंसिर । जिल्ला प्रहरी कार्यालय पर्साले अवैध लागूऔषधसहित १ जनालाई पक्राउ गरेको छ । पर्साको छिपहरमाई गाउँपालिका वडा नम्बर ४ बन्जारी पुलस्थित सडक खण्डबाट प्रहरी चौकी भिस्वा बन्जारीबाट खटिएको टोलीले विभिन्न लागुऔषधसहित १ जनालाई पक्राउ गरेको हो ।
भारतबाट नेपालतर्फ आउदै गरेको ना.४५ प. ११६४ नम्बरको मोटरसाइकललाई आशंकाको आधारमा रोकेर पर्साको धोबिनी गाउँपालिका वडा नम्बर २ आसवारी निवासी २६ वर्षीय दिवाकर कुमार साहको साथबाट अवैध लागुऔषध फेला परेको हो ।
निजले बोकेको सेतो नाइलनको झोलामा लुकाइछिपाई ल्याएको नुफ्रिन ४५० एम्पुल, डाइजोपाम ४५० एम्पुल र प्रोमिफाइजाम हाईड्रोकोलोराइड ४५० एम्पुल गरी जम्मा १ हजार ३ सय ५० एम्पुल फेला परेको पर्साका प्रहरी प्रवक्ता एवम् प्रहरी नायब उपरीक्षक ओमप्रकाश खनालले बताइ । लागुऔषध तथा मोटरसाइकलसहित साहलाई नियन्त्रणमा लिई लागु औषध सम्बन्धी कसूरमा आवश्यक अनुसन्धान अगाडि बढाइएको डिएसिपी खनालको भनाई छ ।
