काठमाडौं। नेकपा (एमाले)का अध्यक्ष केपी शर्मा ओलीले एमालेविरुद्ध पाँच दल जस्ता अरू १० वटा दल आए पनि केही फरक नपर्ने बताएका छन्। काठमाडौंमा शनिबार आयोजित नेपाल संवत् ११४२ का अवसरमा आयोजित कार्यक्रममा सम्बोधन गर्दै अहिलेको सत्ता गठबन्धन जस्ता १० दल आएपनि एमालेलाई कुनै फरक नपार्ने जिकिर गरे।
चुनावसम्म गठबन्धन गर्छौँ भन्नेहरूप्रति व्यङ्ग्य गर्दै ओलीले एमालेविरुद्ध कसैले चुनाव लड्न नसक्ने प्रस्ट भएको दाबी गरे। उनले भने ‘‘ हामी चुनावसम्म सँगै जान्छौँ भनेर गठबन्धनका मान्छे भनिरहेका छन्। काँग्रेसले त्यसो भनेको मैले सुनेको छैन। अरु फाच्चाफुच्चेहरुचाहिँ सँगै जान्छौँ भनिरहेका छन्।’’
गठबन्धनमा रहेका कांग्रेसबाहेकका दलले अरूको औँलो नसमाती हिँड्नै नसक्ने ओलीको भनाइ थियो। ओलीले एमाले भने कसैको वैशाखी टेकेर नभई एक्लै आफैँ चुनाव लड्न सक्षम रहेको ओलीको भनाइ थियो। सत्तागठबन्धनमा रहेका पाँचदलहरु आउँदो निर्वाचनसम्म गठबन्धन कायम गरेर जाने बताउँदै आएका छन्। सोही भनाइलाई ओलीले कटाक्ष गरेका हुन्।
