काठमाडौं। नेकपा (एमाले)को आशन्न दशौँ राष्ट्रिय महाधिवेशनका लागि विभिन्न निर्वाचन क्षेत्र र जिल्लाबाट छानिएका प्रतिनिधिको विवरण पार्टीको केन्द्रीय कार्यालयमा पठाउने क्रम जारी रहेको छ।
एमालेले छानिएका प्रतिनिधिको विवरण आजसम्ममा केन्द्रीय कार्यालयमा पठाउन निर्देशन दिएको थियो। प्रतिनिधि चयनका लागि देशभर यही २७ कात्तिकलाई तय गरिएको थियो।
सोही दिन अधिकांश जिल्लाबाट सर्वसम्मत रुपमा प्रतिनिधि छानिएका थिए। तर, केही जिल्लामा तथा बाँकी रहेका स्थानमा केही सहमति तथा केही निर्वाचनबाट छानिएर विवरण आउन थालेको छ।
पार्टीले निर्धारण गरेको मापदण्डअनुसार खुल्ला, महिला र उत्पीडित समुदायबाट प्रतिनिधिको छनोट गरिएको छ। हालसम्म केन्द्रीय विभाग, प्रदेश कमिटी, जिल्ला कमिटी, विशेष जिल्ला कमिटीबाट प्रतिनिधि आइसकेका छन्।
यस्तै, जनसङ्गठन र प्रवासबाट सहित कुल ९० प्रतिशतको हाराहारीमा प्रतिनिधि निर्वाचित भइसकेको एमालेको केन्द्रीय कार्यालयका सचिव शेरबहादुर तामाङले जनाए। प्रतिनिधि चयन भएकाको विरणलाई डिजिटल रुपमा अभिलेखीकरण गरिनेछ।
गत असोजमा विधान महाधिवेशन सम्पन्न गरेको एमालेले नयाँ नेतृत्व चयनका लागि आगामी १० देखि १२ मंसिरसम्म चितवनको सौराहमा राष्ट्रिय महाधिवेशन गर्दैछ। सो पार्टीले एक हजार ९९९ प्रतिनिधि चयन हुने जनाएको छ। त्यसको पाँच प्रतिशतसम्म मनोनित प्रतिनिधि हुन सक्नेछन्।
