गोरखा। पूर्वप्रधानमन्त्री एवं जसपा संघीय परिषद् अध्यक्ष डा बाबुराम भट्टराई जनताका घरदैलोमा पुगेका छन्। जसपाको सुज (पार्टी संगठन सुदृढीकरण तथा जनपरिचालन) अभियान लिएर उनी गोरखाका सबै गाउँपालिका रनगरपालिकामा जनताको घर–घरमा पुग्ने अभियान थालेका हुन्।
यो अभियान २२ कात्तिकदेखि ३ मंसीरसम्म सञ्चालन हुने जनाइएको छ। तल्लो तहका जनताका गुनासा र वास्तविकता बुझ्न र अहिलेको राष्ट्रिय राजनीतिबारे बुझाउन उनी यस्तो अभियानमा निस्केका हुन्। अभियान ३ मंसीरमा बाल्वामा स्वास्थ्य शिविर कार्यक्रमपश्चात् टुंगिने छ।
सुज अभियानको पहिलो दिनमै भट्टराईले आफू भोट माग्न नभई जनताको वास्तविकता हेर्न र समस्या समाधानको पहल गर्न घर-घरमा आएको स्पष्टीकरण दिए। उनले सही राजनीति नभएसम्म देश नबन्ने ठोकुवासमेत गरे।
अहिलेको राजनीतिक पार्टी र नेतृत्वले देशको विकास हुन नसक्ने उनको दाबी थियो। तत्कालीन एमाले र माओवादी मिलेर बनेको नेकपा (नेकपा) विभाजनलाई उदाहरण दिएर भट्टराईले पुरानो पार्टीबाट अब विकास र समृद्धि सम्भव नहुने विश्लेषण गरे।
साम्यवादको अमूर्त कुरालाई छाडेर सबै राजनीतिक पार्टीलाई समाजवादी धारमा लाग्नसमेत उनले आग्रह गरे। “पुराना पार्टीबाट देशको विकास र समृद्धि सम्भव छैन। विकासको लागि सबैभन्दा पहिले राजनीति ठीक ठाउँमा आउनुपर्छ,” जनभेटघाटको क्रममा उनले भने, “जात र गोत्र त परिवर्तन हुन्छ। विकासका लागि पुरानै पार्टीमा बस्नुपर्छ भन्ने छैन। हाम्रो सोच बदल्न जरुरी छ।”
दुई-दुई पटक विघटन भएर संसदले पुनर्जीवन पाएको भन्दै तत्काल प्रतिगमनको खतरा टरेको बताए। तर, राजनीतिक अस्थिरता, हरेक पार्टीभित्रको बेथिति, देश र राजनीतिको कथाव्यथा भने उस्तै रहेको उनको भनाइ थियो।
‘बुढीगण्डकी बन्छ ?’
भेटघाटमा भट्टराईलाई स्थानीयले आफ्ना समस्या र सरोकारबारे प्रश्न पनि गरे। गोरखा घ्याल्चोक, तोरी स्वारा बेनिघाट, माझीगाउँका जनताले नछुटाएको प्रश्न थियो, “बुढीगण्डकी बन्छ कि बन्दैन ? बने कहिले बन्छ ? कुन मोडालिटीमा बन्छ ?”
बूढीगण्डकी जलविद्युत आयोजनाको योजनाकार भट्टराईलाई गोरखा आउनुअघि यसबारे जनताले प्रश्न गर्छन भन्ने जानकार थिए। त्यसैले सम्बन्धित मन्त्रालयसँग जवाफ मागेर नै गोरखा आएका थिए। उनले आयोजनाले गति लिन नसक्नुको प्रमुख कारण ‘कुन मोडालिटीमा बनाउने’ भन्ने टुंगो नलाग्नु रहेको जानकारी गराए।
दुई महिनाभित्रै बूढीगण्डकीको मोडालिटीबारे टुंगो लाग्ने उनको जिकिर थियो। आठ वर्ष बितिसक्दा पनि आयोजनाको मोडालिटीमै अल्झँदा आफू दुःखी भएको कुरा पनि उनले सुनाए। अस्थिर सरकारको कारण बूढीगण्डकीको यो हालत भएको उनको तर्क थियो।
‘एमसीसीले देश विकास गर्छ’
गोरखा गण्डकी गाउँपालिकाका ३ र ८ नम्बर वडा लगायतका जनताले एमसीसीबारे पनि भट्टराईलाई जिज्ञासा राखे। संसदमा उठेका एमसीसीबारे पक्षविपक्षका सवाल र जवाफलाई उदाहरण दिँदै उनीसँग गण्डकी गाउँपालिकाका जनताले ‘एमसीसी पास गरे देश खान्छ भन्छन् के हो’ भनेर सोधे।
जवाफमा भट्टराईले नेपालमा विकास नहोस् भन्ने तत्वहरूले नै एमसीसीबारे भ्रम छरेका आरोप लगाए। यसमा भारत, चीन र अमेरिका लागेको उनको आरोप थियो। एमसीसी सहयोग लिएर देश विकास गर्नुपर्ने उनको तर्क थियो।
एमसीसीबारे शंका नगर्न जनतालाई आग्रह गर्दै भने, “एमसीसी पास गरे यहाँ अमेरिकी सेना नेपाल आउँछ, नेपाल खान्छ भन्छन्। यी सबै भ्रम हुन्। के त्यस्तो भए, नेपाली सुरक्षाकर्मी के हेरेर बस्छ ? हामी चुप लागेर बस्दैनौं नि। अहिले त हामी सहयोग लिने हो, विकास र समृद्धिमा लाग्ने हो, अहिले कसैसँग निहुँ खोज्ने अवस्थामा हामी छैनौं। पहिले हामी बलियो बन्ने हो अनि पो कसैले हेप्न सक्दैन। अहिले एउटाले सहयोग दिन लाग्दा अर्को देशले भ्रम छर्ने काम गरेको छ, यो गलत काम हो।”
