पाकिस्तान आईसीसी टी २० विश्वकप क्रिकेटको सेमिफाइनलमा पुग्न सफल भएको छ। गएरातिको खेलमा स्कटल्यान्डलाई ७२ रनले पराजित गरेर पाकिस्तानले सेमिफाइनलको यात्रा तय गरेको हो। पाकिस्तानले दिएको १ सय ९० रनको लक्ष्य पछ्याएको स्कटल्यान्डले निर्धारित २० ओभरमा ६ विकेट गुमाएर जम्मा १ सय १७ रन मात्र जोड्न सक्यो। स्कटल्यान्डका लागि रिची वेरिङ्टनले सर्वाधिक ५४ रन जोडे। यस्तै, जर्ज मुन्शेले १७, माइकल लिस्कले १४, कप्तान काइल कोट्जरले ९ रन जोडे।
पाकिस्तानका शदाव खानले दुई तथा हसन अलि, हरिस राउफ र शाहिन शाह अफ्रिदीले एकएक विकेट लिए। यस अघि टस जितेर पहिले ब्याटिङ गरेको पाकिस्तानले कप्तान बाबर आजम तथा शोएब मलिकको अर्धशतकीय पारीको सहयोगमा १ सय ८९ रन जोडेको थियो।
बाबर आजमले सर्वाधिक ६६ रन बनाए भने मलिकले ५४ रनको योगदान गरे। यस्तै, मोहम्मद हाफिजले ३१ र मोहम्मद रिजवानले १५ रन जोडे। स्कटल्यान्डका क्रिस ग्रेभ्सले दुई तथा हम्जा ताहिर र सफ्यान सरिफले एकएक विकेट लिए। अब पाकिस्तानले फाइनल प्रवेशका लागि आउँदो बिहीवार सुपर १२ को समूह २ को उपविजेता अष्ट्रेलियासँग खेल्नेछ।
