काठमाडौं– फिल्म ‘गोर्खा वारियर–२’को लागि ३४ जना कलाकार छानिएका छन् । फिल्मको लागि आवश्यक गोर्खा सैनिकदेखि विभिन्न पात्रको भूमिकाको लागि लिइएको अडिसनमा सहभागी एक सयभन्दा बढी व्यक्तिमध्येबाट ३४ जना चयन भएका हुन् ।
फिल्मको निर्माता तथा निर्देशक मिलन चाम्स, द्वन्द्व निर्देशक हिमाल केसी, छायाकार सुदीप बराल, मुख्य सहायक निर्देशक गिरीराज घिमिरेको टिमले अडिसनबाट कलाकार चयन गरेको हो । छानिएका मध्ये अधिकांश कलाकार गोर्खा सैनिकको भूमिकामा हुनेछन् ।
फिल्मको छायांकन कोभिड–१९ र विभिन्न प्राविधिक कारणले रोकिएको थियो । अब बाँकी छायांकन तिहारलगत्तै सिन्धुलीदेखि सुरु हुने यसका निर्माता निर्देशक चाम्सले बताए । त्यसपछि बाँकी छायांकनको लागि युनिट तनहुँ जानेछ । यसअघि सोलुखुम्बुसहित नेपालका केही स्थानमा फिल्मको छायांकन सम्पन्न भइसकेको छ ।
नेपालको छायांकन सकिएपछि बेलायत, भारत, मलेशियालगायतका देशमा बाँकी छायांकन सम्पन्न गरिनेछ । लन्डन सिनेआई प्रोडक्सनको प्रस्तुति र चाम्स इन्टरटेनमेन्टको सहकार्यमा निर्माण हुने फिल्ममा सह–निर्माताको रुपमा सुरेश राई छन् ।
फिल्ममा रेविका गुरुङ, विजय लामा, रियर राई, भुवन सिंह राई, शिशिर बाङ्देल, बुद्धि तामाङ, कविता आले, बिरूप घले, सारा राई, मनोज केसीलगायतका कलाकारको अभिनय रहने छ । रितेस चाम्सले नवनायकका रूपमा यो फिल्मबाट डेब्यु गर्दै छन् ।
फिल्ममा शैलेन्द्र खनाल ‘शरद’को गीत, एलिस कार्कीको संगीत, राजेशपायल राईको गायन, मिलन चाम्स र गिरिराज घिमिरेको लेखन, अर्जुन बीसीको सम्पादन, सुदीप बरालको डीओपी र हिमाल केसीको द्वन्द्व रहनेछ । फिल्म सन् २०२२ मा रिलिज हुनेछ ।
