काठमाडौं। प्रधानमन्त्री शेरबहादुर देउवाले विविधतायुक्त धर्म संस्कृतिले राष्ट्रिय एकतालाई थप मजबुत बनाउने र नेपालीलाई एकताबद्ध हुन प्रेरणा दिने बताएका छन्।
नेपाल संवत्को नयाँ वर्ष ११४२ को शुरुवातको अवसरमा शुभकामना सन्देश दिँदै देउवाले नयाँ वर्षले सबै नेपालीमा सहिष्णुता, भाइचारा र आपसी सद्भाव बढाउने विश्वास पनि व्यक्त गरेका छन्।
सन्देशमार्फत देउवाले नेपाल संवत् ११४२ को उपलक्ष्यमा समस्त नेपाली दिदीबहिनी तथा दाजुभाइमा सुख, शान्ति र समृद्धिको मंगललमय शुभकामना व्यक्त गरेका छन्।
ऋणमा डुबेका नेपाली जनतालाई ऋण र दासत्वबाट मुक्त गराई नेपाल संवत्का प्रवर्तक राष्ट्रिय विभूति शंखधर साख्वाःले स्वाभिमान र स्वतन्त्रतापूर्वक बाँच्ने अवस्था सिर्जना गरेको देउवाले सन्देशमा उल्लेख गरेका छन्।
गरिवी उन्मूलनको अभियानका कारण साख्वाःलाई राष्ट्रिय विभूति पदले सम्मानित गरिएको पनि देउवाले उल्लेख गरेका छन्।
