वीरगञ्ज, १७ कार्तिक । ४ दिनको अवधिमा खानेतेलको कच्चा पदार्थ लिएर आएका २ सय भन्दा बढी गाडीहरु वीरगञ्ज भन्सारको एकीकृत भन्सार चौकी(आइसीपी)मा थुप्रिएका छन् ।
४ दिनमा यार्डभित्रै २ सय १ वटा कच्चा तेल बोकेको टयांकर होल्ड भएको आइसीपी सञ्चालन गर्ने नेपाल इन्टरमोडेल यातायात विकास समिति वीरगञ्जका कर्मचारी प्रभास झाले बताए । तेस्रो मुलुकबाट आउने ती कच्चा पदार्थ पानीजहाजमार्फत ती दुई बन्दरगाहमा आउने र त्यसपछि ट्यांकरमार्फत नेपाल ल्याउने गरिन्छ । तथ्यांकका अनुसार सोमबार मात्रै १ सय २८ ट्यांकर कच्चा पदार्थ लिएर आइसीपी भित्रिएका छन् भने ७३ वटा चार दिनदेखि होल्ड भएका छन् ।
सोयाविन, पाम र सनफ्लावर तेलको क्रुड आयल (कच्चा पदार्थ) कोलकाता र हल्दियाबाट ल्याएको ट्यांकर चालकले बताए । भारत सरकारले पाम, भटमास र सूर्यमुखी तेलको कच्चा तेलको भन्सार दुई तहले घटाएपछि नेपालमा आयात भएका कच्चा पदार्थ होल्ड हुन थालेको हो । भारतमा भन्दा खानेतेलको भन्सार नेपालमा सस्तो हुँदा तेस्रो मुलुकबाट ल्याएर सामान्य प्रशोधन गरेर भारत निकासी भइरहेको थियो । भारतले भन्सार दर नेपालको जस्तै बनाएपछि नेपालबाट निकासी प्रभावित बन्न थालिसकेको छ । अहिले पहिला डिल भएका तेल मात्रै भारत निकासी भइरहेको छ । एक उद्योगीका अनुसार कतिपयले बाटोमै कच्चा पदार्थ होल्ड गर्न थालेका छन् । गत असोज २० गतेदेखि कच्चा पदार्थ बोकेको ट्यांकरमा कमी आएको छ । त्यस्तै भारत निकासी समेत घटेको भन्सारको तथ्यांकमा देखिन्छ । असोज पहिलो सातासम्म दैनिक सयभन्दा बढी ट्यांकर तेल भारत निकासी हुन्थ्यो भने अहिले दैनिक ६० टयांकर मात्र निकासी भइरहेको नेपाल इन्टर मोडेल यातयात विकास समितिका अधिकृत तर्कराज जोशीले बताए । उनका अनुसार दैनिक निकासी हुने परिमाणमा करिब ५० प्रतिशतले गिरावट आएको छ । पछिल्लो तीन वर्षको अवधिमा नेपालमा उत्पादन हुने मध्ये ८० प्रतिशत प्रशोधित पाम, सोयाबिन र सनफ्लावरको तेल भारत निकासी हुन्थ्यो ।
नेपाल उद्योग वाणिज्य महासंघका केन्द्रीय सदस्य सुबोध गुप्ताका अनुसार नेपालबाट भारत निकासी गर्ने २१ वटा तेल उद्योगको २० अर्बभन्दा बढीको कच्चा पदार्थ खेर जाने अवस्था आएको छ । वीरगञ्ज उद्योग वाणिज्य संघका अध्यक्षसमेत रहेका गुप्ताका अनुसार हरेक उद्योगले करिब उद्योगले ७५ लाखदेखि डेढ अर्बसम्मको कच्चा तेल राखेका छन् ।
