एजेन्सी। इथियोपियाको मन्त्रिपरिषद्ले देशभर लागू हुने गरी संकटकालको घोषणा गरेको छ। अदिस आबाबको अधिकारीहरुले तत्काल प्रभावकारी हुने गरी संकटकालको घोषणा गर्दै नागरिकलाई देशको सुरक्षाका लागि तयारी अवस्थामा बस्न आग्रह गरेको छ।
देशको उत्तरी क्षेत्र टिइग्रेबाट विद्रोही समूह देशको केन्द्रभागतर्फ अघि बढ्ने चेतावनी दिए लगत्तै त्यहाँको सरकारले संकटकालको घोषणा गरेको हो।
‘राष्ट्रिय संकटकाल नागरिकको सुरक्षालाई ध्यानमा राख्दै लागू गरिएको हो’, त्यहाँको सरकार सम्बद्ध सञ्चारमाध्यमले भनेको छ, ‘देशको विभिन्न भागमा विद्रोही समूहले आक्रमण गर्न थालेपछि सुरक्षाका लागि यस्तो कदम अपनाइएको हो।’
इथियोपियाको विद्रोही समूह टाइग्रे जनमुक्ति मोर्चा त्यहाँको संघीय सरकारको विरोधमा गत वर्षदेखि उत्रिएको हो।
६ महीनाका लागि घोषणा गरिएको राष्ट्रिय संकटकालका अवसरमा सेनाको कामलाई प्रभावकारी बनाउन ‘कर्फ्यू’ लगाउनेदेखि बाटोघाटो बन्द गर्नेसम्मको कदम चाल्न सकिने बताइएको छ।
यस्तै आतंकवादी समूहसँग सम्बन्ध रहेका कोही पनि व्यक्तिलाई अदालतको आज्ञाबिना नियन्त्रणमा लिनसकिने छ। भने, सेनामा सहभागी हुन उमेर पुगेका नागरिकलाई सैन्य सेवामा आवद्ध बनाउन पनि सरकारले सक्ने सुविधा संकटकालको समयमा प्राप्त गर्नेछ।
‘हाम्रो देशले आफ्नो अस्तित्व, सार्वभौमिकता र एकतामाथि नै खतरा उत्पन्न हुने प्रकारको खतरराको सामना गरिरहेको छ। यो अवस्थालाई हामी अन्य समान्य समयमा अपनाइने कानून र नियमको पालना गर्दै सम्बोधन गर्न सक्दैनौँ’, त्यहाँका न्यायमन्त्रीले राज्य नियन्त्रित सञ्चार माध्यमसँगको कुराकानीका क्रममा बताएका छन्।
उनले सरकारी कदमको अवज्ञा गर्ने कुनै पनि व्यक्तिलाई ३ देखि १० वर्षसम्मको सजाय हुनसक्ने बताए। यस्तै विद्रोही समूहलाई कुनै पनि प्रकारको आर्थिक अथवा मानसिक सहयोग गर्ने व्यक्तिलाई पनि सरकारले सोही अवधिको सजाय तोक्न सक्ने न्यायमन्त्रीले बताएका छन्।
विद्रोही समूह टाइग्रेले हालैका दिनमा इथियोपियाको रणनीतिक स्थान अम्हारा, डेसी र कम्बोल्चा शहर कब्जा गरेको बताएसँगै सरकारले यस्तो कडा कदम चालेको सरकारी अधिकारीको जिकिर छ। विद्रोही समूहले केही दिनमा अर्को शहर आदिस अबाब पनि आफ्नो नियन्त्रणमा आउने दाबी गरेसँगै इथियोपिया सरकार थप सचेत भएको हो।
सेनाले राजधानीबाट ४ सय कोलोमिटर मात्रै टाढा रहेको दुई महत्वपूर्ण शहरलाई आफ्नो नियन्त्रणमा राख्न विद्रोही समूहसँग युद्ध गरिरहेको समेत सरकारले जनाएको छ।
इथियोपियाका उत्तरी क्षेत्र केन्द्रीय सरकारको सम्पर्कबाट टाढा रहेको छ। उक्त स्थानमा पत्रकारलाई समेत प्रवेश गर्न दिएको छैन। त्यसकारण पनि सरकारलाई त्यहाँको यर्थाथ वस्तुस्थितिका विषयमा ठोस जानकारी नभएको बताइन्छ।
इथियोपियाका सरकारी अधिकारीहरुले अदिस आबाबाका बासिन्दाहरुलाई आफूसँग भएको हतियार दर्ता गर्न र शहरको सुरक्षाका लागि तयारी अवस्थामा बस्न समेत आग्रह गरेको छ।
