टी-२० विश्वकप क्रिकेट अन्तर्गत आज सम्पन्न खेलमा नामिबियाले स्कटल्यान्डलाई हराएको छ। आबुधाबीस्थित जायेद क्रिकेट स्टेडियममा सम्पन्न खेलमा स्कटल्यान्डलाई ४ विकेटले हराउँदै नामिबियाले जारी विश्वकपमा विजय सुरुवात गरेको हो।
टस हारेर ब्याटिङको निम्तो पाएको स्कटल्यान्डले निर्धारित २० ओभरमा ८ विकेट गुमाउँदै १०९ रन बनाएको थियो। ११० रनको लक्ष्य पछ्याएको नामिबियाले ५ बल बाँकी छँदा ६ विकेट गुमाउँदै लक्ष्य भेट्टायो।
सुरुवाती ब्याटिङमा उत्रिएको स्कटल्यान्डको लागि माइकल लिस्कले सर्वाधिक ४४ रन बनाउँदा क्रिस ग्रिभ्सले २५ र म्याथ्यु क्रसले १९ रन जोडे। अन्य ब्याटरले उल्लेख्य प्रदर्शन गर्न सकेनन्।
बलिङतर्फ नामिबियाका रुबेन ट्रम्पेलमानले सर्वाधिक ३ विकेट लिँदा जेन फ्रिलिंकले २ तथा जेजे स्मिथ र डेभिड वाइजले १/१ विकेट लिए।
जवाफी ब्याटिङमा उत्रिएको नामिबियाका लागि जेजे स्मिथले अभिजित रहँदै सर्वाधिक ३२ रन बनाउँदा क्रेग विलियम्सले २३, माइकल भान लिंगेनले १८ र डेभिड वाइजले १६ रन जोडे।
स्कटल्यान्डका माइकल लिस्कले २ तथा सफ्यान शरिफ, क्रिस ग्रिभ्स, मार्क वाट र ब्राड ह्विलले समान १/१ विकेट लिए।
त्यस्तै, आजै भएको पहिलो खेलमा इंग्यान्डले बंगलादेशलाई हराएको छ। आबुधाबीस्थित जायेद क्रिकेट स्टेडियममा सम्पन्न खेलमा बंगलादेशलाई ८ विकेटले हराउँदै इंग्यान्डले जारी विश्वकपमा विजय यात्रालाई कायम राखेको हो। इंग्यान्डले यसअघि वेस्ट इन्डिजलाई हराएको थियो।
